шамбалын сэсэгүүд. цветы шамбалы

ЦЫРЕНДУЛМА ДОНДОГОЙ ШАМБАЛЫН СЭСЭГYYД Улаан-Үдэ 2013 1 УДК 89 ББК 84 (2 Рос=Буря) бу Ш 191 Ш 191 Шамбалын сэсэгүүд. / - Улаан-Үдэ; «Буряад үнэн» Хэблэлэй байшан, 2013. - 266 нюур + үнгэтэ зурагууд 0,5 п.л. 2011-2014 ондо бэелүүлэгдэхэ «Буряад хэлэ хадагалан үлдөөжэ, болбосоруулан хүгжөөхэ» гэһэн Буряад Республикын гүрэнэй программын хэмжээн соо Буряад Республикын соёлой министерствын «Уран зохёолой юртэмсэ» гэһэн грантын мүнгөөр хэблэгдэбэ. Яруунын аймагай нютагай өөһэдын захиргаан (толгойлогшонь Ц.Г. Шагдаров), «Буряад үнэн» Хэблэлэй байшан (директор - ахамад редактор В.В. Хартаев) мүнгэн дэмжэлгын талаар өөһэд өөһэдынгөө хубита оруулаа. УДК 89 ББК 84 (2 Рос=Буря) бу © ИД «Буряад үнэн», 2013 ISBN 978-5-905958-04-5 2 ОРОЛТО ҮГЭ Буряадай үнэн һэшхэлтэ сэтгүүлшэдэй, үндэр долгито яруу найрагшадай түрүү манлайда Яруунаһаа гарбалтай Цырендулма Цыреновна Дондогойн нэрэ онсо толорон мандажа, сагай ошохо тума саглашагүй удхаяа нэмэжэ байһандал юм. Бии байгаа хүсэл зоригоо, эрдэм мэдэсэеэ эршэдүүлэн, нара буляалдаанай тэмсэлдэ шармайн ороһон һүлдэ һүрөө ехэтэй буряад эхэнэр хубиингаал алдар суугай түлөө бэшэ, арад түмэнэйнгөө түлөө ами наһаяа зорюулһан гээшэ. Гүрэн түрын зүгһөө Ц.Ц.Дондогой үндэр зиндаа нэрэ зэргэнүүдтэ хүртөө. Өөрөө өөртөө, арадтаа гол хайра шагналынь хадаа халуун хүсэлһөө байгуулһан яруу найрагайнь, һүзэг бишэрэлэйнь оршон болоно. Буряадай арадай поэт Цырендулма Цыреновна Дондогойн мүнхэ дурасхаалда зорюулагдаһан энэ ном хадаа үгүүлһэн үгынь сэнтэйе, хэһэн хэрэгэйнь хэмжээлэшэгүй ехые, уянгата шүлэгүүдэйнь ульһатай эршэтэйе гэршэлнэ. Хатуу хабтаһатай халуун мүрнүүдтэй энэ ном соо поэдэй удаа дараалан хэблэн гаргаһан номуудһаа шүүбэринүүд шэлэн абтаһан, үе саг болон уран зохёол тухай өөрынь һанамжата статьянууд, зохёохы ажал тухайнь шэнжэлэлтэ бүтээлнүүд үгтөө. Зон соо золтойгоор бадаран байг лэ элитэ поэдэй алдар нэрэнь, аялгата шүлэгүүдынь, абаралта һүзэг бишэрэлынь. Иигэжэ үнэн зүрхэнһөө хүсөөд, шэнэ номоорнь амаршалаял даа, та бүгэдэнөө, уншагшадаа. “Буряад үнэн” Хэблэлэй байшангай коллектив, “Ярууна” нютагай эблэлэйхид. 3 ЦЫРЕНДУЛМА ДОНДОГОЙН ПОЭЗИ ТУХАЙ Буряад арадай мэдээжэ, элитэ поэт, журналист, оршуулагша, ехэ талаан бэлигтэй, зохёохы ажалаараа буян хэшэгтэй, һайхан сагаан сэдьхэлтэй, олон тоото залуу поэт, журналистнуудые хүмүүжүүлэн дэмжэгшэ, манай эгэшэ нүхэр Цырендулма Цыреновна Дондогойн түрэһэн тоонтонь Яруунын аймагай Эгэтын-Адаг болоно. Түрэл нютагаа магтажа олон зохёол бэшэһэн байна. Нэгэ шүлэг соогоо иигэжэ бэшэнэ: Эгэтын-Адаг – Эльгэн һайхан нютагни. Энээхэн дайдада Эдир наһам үнгэрөө. Нютагай нэрэнүүд – Нюуса түүхэнүүд. Шара-Тала, Шара-Горхон, Эдинсэ һайхан ногоотой Эгэтэ, Маарагтын голнууд, Хархын-Адаг, Хангира, Тахяаша – Хаанашье үгыл даа Иимэ нэрэтэй нютагууд. Маарагтын хадануудые оройлон Манан сооһоо мандайха Буряадуудай тахилта хада Буурал-Хатан эжы. Һайхан энэ нютагта Һайн хүнүүд хэр угһаа Һайханаар ажаһуугаа. Үнэхөөрөөшье, поэт Ц. Дондогой Ярууна нютагай гүн ехэ амисхаал, уһата гол горходойнь хүнхинөөн, олон хүхэ нуурнуудай, хада уула, арса жодоогой арюун хангал амсажа, шугы бургааһан соогуур шурган наадажа үдэһэн хадаа, энэ баялигые зүрхэ с